SKY vs SKYKICK商標侵權
八年紛爭終極裁決

住喺英國🇬🇧嘅讀者應該對SKY唔陌生，SKY LIMITED係英國其中一間電視廣播及電訊公司，主要提供收費電視、寬頻及電話服務，新丁都係其中一個用戶。

至於SKYKICK，其實係一間科技初創公司，主要提供兩項服務:

🔹Cloud Migration - 協助公司將電郵轉移到雲端

🔹Cloud Backup - 雲端備份及儲存服務

。

🔸案件背景🔸

一睇兩個logo嘅相似程度，就明白點解SKY會控告SKYKICK侵犯佢地已經註冊嘅商標；但SKYKICK就反擊話SKY嘅商標註冊存在三大問題:

1️⃣ 商標註冊範圍太闊，包括好多冇打算推出市場嘅產品，例如: 漂白劑 (Bleaching Preparation, Class 3)，隔熱物料 (Insulation Materials, Class 17)，鞭子 (Whips, Class 18)。

2️⃣ 商標註冊描述過分空泛，例如「Computer Software」並冇具體列明用途。

3️⃣ 註冊商標目的存在惡意 (Bad Faith)，因為申請嘅時候，已經知道冇可能用晒所有註冊類別。

。

🔸訴訟過程🔸

🔻2018年High Court裁決，認同SKY已註冊商標保護範圍太寬闊，並認為部份商標係惡意註冊 (Bad Faith) 而無效。但High Court仍然判決SKYKICK提供嘅兩項服務係有對SKY侵權。

🔻SKY不服裁決，並上訴至Court of Appeal。

🔻2021年Court of Appeal推翻High Court裁決，認為SKY並唔需要對每個商標註冊類別都要有具體使用計劃。

🔻SKYKICK不服裁決，並上訴至Supreme Court。

。

🔻2024年UKSC最終裁決，又再推翻Court of Appeal判決。

關於惡意註冊，UKSC支持High Court原判，確認SKY部份註冊存在惡意，並指出SKY喺審訊前5星期先收窄申索範圍，反映佢地濫用商標註冊原意，確立即使用咗空泛描述，例如: Computer Software，都可以因為惡意註冊而部份失效。

至於SKYKICK嘅侵權，有部份成立:

✅ Cloud Migration服務並冇侵權，因為只係電郵轉移，唔屬於提供「電郵服務」(Electronic Mail Service) 範圍。

❌ Cloud Backup服務構成侵權，因為呢種儲存到雲端嘅服務，屬於通過「電腦存取文件」(Accessing and Retrieving Documents via Computer Network) 範圍。

。

🔸新丁自娛comment🔸

商標註冊一路以來都係俾大公司地圖炮咁註冊，有幾多類別就全部註冊咗先，因為每註冊一個界別 (Class) 都需要註冊費用，所以細公司或者初創公司，通常都好難搶先註冊所有界別。

但呢個case之後，商標註冊可能會有以下影響:

1️⃣ 只係註冊打算推出市場嘅商品類別，而且最好保留有關使用意圖證據，例如相關商業計劃

2️⃣ 新註冊同現有商標，都應該主動收窄範圍，加入更具體描述

。

既然唔可以全部註冊，其實調返轉係咪會有人惡意使用商標? 例如我依家即刻註冊「姜濤牌豉油」呢個商標，仲要投入生產，咁我咪可以用咗呢個名?🤔

。

💡乜嘢係「自娛A區」⁉️

其實係屯門市鎮公園俾一班阿伯阿姐唱歌自娛嘅地方😂

新丁平時有留意開🇬🇧UK Supreme Court (UKSC) 嘅Judgment，所以希望透過「自娛A區」，用淺白語言同大家分享最新案例。