法庭審訊結果 = 真相⁉️

跟進咗超過一年，坦白講，單案嘅所有證據我都覺得冇咩大問題，唯一嘅問題係當事人嘅態度。

好多人會覺得「我係清白嘅，只要我將事實全部講晒出嚟，法官同陪審團自然會明」。。但事實係喺法庭上，「策略」往往比「真相」更影響結果。

。

新丁想借用一個經濟學概念「凱恩斯選美遊戲。Keynesian Beauty Contest」嚟講解。

💡凱恩斯講過，股票市場就好似報紙搞嘅選美比賽，讀者要喺一百張美女相片當中，揀出最靚六個，揀中「最多人選擇」嘅美女就算贏。

咁你會點揀?

🤔揀你自己覺得最靚嘅?

🤔揀你預測「大多數人」會覺得最靚嘅?

🤔定係揀你預測「大多數人會預測大多數人」覺得最靚嘅?

。

即係喺法庭上，唔係你覺得自己清白就夠，而係要說服陪審團會點睇你係咪清白，又要諗埋陪審團心目中「一個合理嘅人會點睇呢件事」。

💡陪審團係普通人 (layman)，好容易會有「第一印象」，而唔係證據主導判斷。

💡有部分證據我地預知陪審團一定會留意，亦有部分問題我地預知控方一定會追問。

。

可惜根據大律師描述，第一次審訊時當事人情緒失控，對佢喺陪審團面前「建立正面形象」係完全冇幫助。當事人唔明白呢場「博弈」背後嘅邏輯，只係不停強調「我冇罪」，反而無助於建立佢清白嘅論點。

。

從事法律工作越耐，越體會到一件事:

💡法庭上嘅勝負，好多時只係博弈遊戲裏面策略運用嘅結果，並唔一定等於真相本身。

💡清白嘅人未必贏到官司，贏到官司嘅人未必清白，呢個本身就係陪審團制度嘅局限。

所以信任你嘅法律代表、了解背後嘅程序邏輯 (即係識個遊戲點玩)，學識喺庭上「點樣表達自己」，往往同「你本身係咪有理」一樣重要。

#上庭其實更似一場博弈遊戲

#明就明

#唔明就黎明

照片來源: Ministry of Injustice